به‌خێربێن به‌ڕێزان ماڵپه‌ڕی هیوا پێکهاته‌ی ڤیدیو کلیپ میوسیک فیلم پرۆگرام له‌خزمه‌ت به‌ڕێزتاندایه‌ سه‌ردان بکه‌ن رۆژانه‌ نوێ ده‌کرێته‌وه‌

له‌ودیو ئاسمانه‌وه

 

تاڵ تاڵی پرچه کاڵه خاوه‌که‌م

له په‌نجه‌ی تیرۆژه‌کان ده‌ئاڵێنم و

ده‌یده‌م به ڕوخساری خه‌واڵووتدا

هه‌رچی ماچه نه‌کراوه‌کانی لێوه هه‌نارییه‌کانمه

ئه‌یخه‌مه باوه‌شی په‌ڵه هه‌ورێکی چاو ڕه‌ش و

له هه‌ر کوێ بی

تێر ماچ ئه‌ده‌م به شانی لێوانتدا

هه‌ر له‌ودیو ئاسمانه‌وه

ئه‌بمه هاوڕێی فریشته‌یه‌ک و

ڕوخسه‌تی لێ وه‌رئه‌گرم

شه‌وێکی تار بێمه ناو چاوه‌کانته‌وه و

ببمه شازاده ...له خه‌ونتدا

کاتێ په‌لکه زێڕینه‌ت دی

باوه‌ڕ به دایکت نه‌که‌ی

گه‌ر پێی ووتی ئه‌وه پرچی حه‌زره‌تی

ئایشه‌ و فاتمه‌یه

نااااااااا.....

ئه‌وه خه‌ونه نه‌هاتووه دییه‌کانی منن

له‌ودیو ئاسمانه‌وه

شۆڕ ده‌بنه‌وه به ژیانتدا

چی خه‌نده و شادییه هه‌ڵنه‌پچڕاوه‌کانی

ته‌مه‌نه پایزییه‌که‌مه

بێ ئه‌وه‌ی بیانکه‌مه‌وه

ئه‌یانخه‌مه سه‌ر لێوی مانگه شه‌و و

هه‌ڵیدێنم ... له ئامێزی ئاسمانتدا

هه‌ر له‌ودیو ئاسمانه‌وه

له‌سه‌ر ئه‌ژنۆ دائه‌نیشم و

تکا له دادار ئه‌که‌م

ئازادی و ئاشتی ببارێنێ

به‌سه‌ر ووڵاته بێ نازه‌که‌ی هه‌ردووکماندا

له‌ودیو ئاسمانه‌وه

به کۆڵانه‌کانی به‌هه‌شتا

گوزه‌ر ئه‌که‌م و نابمه په‌ری

نه‌کا بمکه‌نه دیاری پیاوچاکێک و

بڵێن هانێ حۆری

له‌ودیو ئاسمانه‌وه

سوێندێک ئه‌خۆم

هه‌رگیز خۆشم نه‌وێیته‌وه

نه تۆ

نه درۆ

نه کوڕێکی تری وه‌ک تۆ

بۆیه له‌گه‌ڵ بارانێکدا

گشت چرپه‌کانی دڵم بۆلات ئه‌نێرم و

ئه‌یبارێنم به په‌نا گوێتدا

ئه‌ی کوڕی ئازاره‌کانم

هه‌تا ماوی خه‌مه‌کانم

ئه‌ترپێنن له دڵتدا

 

کانی هه‌ڵه‌بجه‌یی

هۆڵندا

Kany_awin@hotmail.com